Pour ceo que les bones gens du roiaume d'Engleterre sont enbrasez a sçavoir lire et escrire, entendre et parler droit françois, a fin qu'ils puissent entrecomuner bonement ové lour voisins, c'est a dire les bones gens du roiaume de France, et ainsi pour ce que les leys d'Engleterre pour le graigneur partie et aussi beaucoup de bones choses sont misez en françois, et aussi bien pres touz les seigneurs et toutes les dames en mesme roiaume d'Engliterre volentiers s'entrescrivent en romance, tres necessaire je cuide estre aus Engleis de sçavoir la droite nature de françois. A le honneur de Dieu et de sa tres doulce miere et toutz les saintez de paradis, je, Johan Barton, escolier de Paris, nee et nourie toutez voiez d'Engleterre en la conté de Cestre, j'ey baillé aus avant diz Anglois un Donait françois pur les briefment entreduyr en la droit language du Paris et de païs la d'entour, la quelle language en Engliterre on appelle 'doulce France'. Et cest Donait, je le fis la fair a mes despenses et tres grande peine par pluseurs bons clercs du language avantdite. Pur ce, mes chiers enfantz et tres doulcez puselles que avez fain d'apprendre cest Donait, sçachez qu'il est divisé en belcoup de chapiters, si come il apperera cy avale. (zit. n. Städtler, Thomas (1988): Zu den Anfängen der französischen Grammatiksprache. Textausgaben und Wortschatzstudien (= Beihefte zur Zeitschrift für Romanische Philologie 223). Tübingen: Niemeyer 86-127).
La sisme regle est cestuy, que quant un mot signifie chose qu'est masle, se vous pouvez cognoistre a le oïl, donques il serra sonné communement sanz e au bout, si come un cheval, un chevalier, se ne soit sa nature de avoir un e au bout, si come pere, frere, mais quant il y a un mot que signifie chose femelle, doncques il serra communement sonné on e a bout, si come dame, femme et tielz semblables. Mais cy endroit il fault entendre que quant l'en ne peut cognoistre au le oïl de ascun mot, se il signifie chose masle ou femmelle, doncques il fault ascouter le parler de eux que mieulx sonnent, qar il y a grande foison des tielx mos que en leur nature sont femelles et pour tant toutez vois ils serront sonnez come s'ils serroient maslez sanz e a bout, si come la foison, ma maison, ta raison, sa seison. Oultre sçachez icy tres bien et gardez vous mesouen que e soit sonné fort au bout du mot quant ascun mot fine en e, et se il ne fine pas ainsin, que vous la ne le sonné mie. (zitiert nach Städtler 1988: 129-130)
Quantez geners est il? Cinq. Quelx? Le masculin, le femenyn, le neutre, le commun de deux, le comun de trois.
Quel mot est masculin genre? Cil que parle de chose masle, c'est a dire resemblant par nature a un home, si come un enfant, un cog, un ceval, et ainsi des aultres. Et quel mot est femenyn genre? Cil que parle de chose femmelle, c'est a dire resemblant par nature a une femme, si come une pucelle, une geline, une vache et ainsi des aultres.
Ci endroit il fault prendre garde q'en parlant françois qu'on ne mette pas masle pour femmelle ne a contraire, si come le pour la, mon pour ma, ton pour ta, son pour sa et ainsi des autres, si come ma pere, mon mere, qar on doit dire mon pere, ma mere.
Et quel mot est neutre genre? Cil que parle de chose que par nature ne resemble mye ne a masle n'a femmelle, si come un bank, un huis, une scelle, un cuilier, un cene et ainsi des autres. Mais icy sçachez que chescun mot que par nature est neutre genre non obstant ce toutez vois est parlé en françois come il fust un masculin ou femenyn selonc ce que leur usage demande, come il apert aux exemples avant ditz.
Quel mot est comun de deux geners? Cy que une foiz apartient aux maslez et une aultre foiz aux femmelles, mais quant il apartient au femenyn, un e plus serra mise au bout, ait il un e en masculyn ou non, si come un, une, bel, belle, bon, bonne, né, nee, engendré, engendree, enflé, enflee. Et tielx mos pour la greigneur partie sont appellez nouns adjectifs. (zitiert nach Städtler 1988).